Ошто мыйзамсыз курал алып жүргөн топ кармалды. Алар милицияга каршылык көрсөтүшкөн

Ош шаарында кылмыштуу топтун мүчөлөрү кармалды. Башкармалыктан билдиришкендей, алардын жанынан мыйзамсыз курал-жарак табылды.

Белгиленгендей, аталган топтун мүчөлөрүнүн унаасынан АКСУ-74У үлгүсүндөгү автомат (магазининде 4 огу бар болгон), 1 даана тапанча (магазинде 3 огу бар) алынган. Кармоо учурунда балдар милиция кызматкерлерине каршылык көрсөтүшүп, качууга аракет жасашкан.

Автоунаада отурган Жалал-Абад облусунун Аксы районунун тургуну 1996-жылы туулган Ө. уулу Т., Ош облусунун Өзгөн районунун тургуну 1993-жылы туулган А. уулу Э. жана Ош облусунун Кара-Суу районунун тургуну 1994-жылы туулган Ш.Т. кармалып, тергөө кызматына жеткирилди.

Учурда алгачкы тергөө амалдары жүрүп жатат. Кармалгандардын баары мурда бир нече жолу сот жообуна тартылышкан жарандар.