Демилгечи Садыр Жапаров. Чолпон-Атада жаңы парк ачылды

Чолпон-Ата шаарында Садыр Жапаровдун тапшырмасы менен курулган жаңы парк ачылды. Иш-чарага өлкө башчы катышканын президенттин администрациясы кабарлады.

Эс алуу жана сейилдөө үчүн жерди уюштурууну президент демилгелеп, бул максатта №2 Мамлекеттик резиденциясынын аймагынан жер бөлүп берген.

Парктын жалпы аянты 16 гектарды түзөт, анын аймагында: амфитеатр, веложол, көпүрөлөр, фонтан, жасалма арал жайгашкан. Парк Чолпон-Ата шаарынын мэриясынын балансына өткөрүлүп берилди.

Садыр Жапаров парк жарым жылдай убакыттын ичинде курулганын жана бул долбоор курулушка туура мамиле кылуу менен мындай объектилерди ачууга болорун дагы бир жолу далилдеп жатканын баса белгиледи.

Мамлекет башчысы инвесторлорду колдоо, алар үчүн жагымдуу шарттарды түзүү, өзгөчө өлкөнүн жыргалчылыгы жана өнүгүүсү үчүн бир нерсе курууну каалаган ата мекендик инвесторлорго жардам берүү керектигине өзгөчө басым жасады.

Президент Чолпон-Ата шаарынын аксакалдарына кайрылып, өсүп келе жаткан муунду өздөрүнүн жана Кыргызстандын келечеги жөнүндө ойлонушу үчүн мекенчилдикке тарбиялоонун маанилүүлүгүн белгиледи.

Буга байланыштуу ал туристтик сезондун алдында айлана-чөйрөнүн тазалыгын сактоого, өлкөнүн коноктору арасында туристтик объектилердин жагымдуулугун арттыруу үчүн инфраструктурага аяр мамиле кылууга чакырды. Анткени бул туризм тармагынын ийгилигинин негизги факторлорунун бири. Кыргызстанда кооз жерлер көп, андыктан башкалар биз жөнүндө таанып-билип жана бул кооздукка ынануусу маанилүү. Ал эми бул жерде жергиликтүү бийликтин гана эмес, аймактын тургундарынын өздөрүнүн да жасаган мамилеси маанилүү деди.

Ошондой эле президент мамлекеттик органдардын жетекчилеринин көңүлүн бюджеттик каражаттарды сарамжалдуу пайдаланууга жана максаттуу пайдалануу үчүн жоопкерчиликти күчөтүүгө дагы бир жолу бурду.