Бишкекте түн ичинде атышуу болду. Окуянын катышуучулары аныкталды

Бишкектин Чүй/Исанов көчөлөрүнүн кесилишинде түндө ок атышуу болуп, окуянын видеосу социалдык тармактарга тарады. Бул боюнча милиция текшерүү иштерин баштап, учурда 5 адам кармалды. Маалыматты Бишкектин Биринчи Май РИИБинен Kaktus.kg сайтына ырасташты.

Такталгандай, 7-августта болжол менен саат 4:00 чамасында Бишкек ШИИББдин нөөмөт кызматына билдирүү түшүп, Чүй/Исанов көчөлөрүнүн кесилишинде белгисиз адамдар ок чыгарганы кабарланган.

Бул факты электрондук журналга катталып, сотко чейинки тергиштирүү башталды.

Жерине барган ыкчам топ 1995-жылы туулган А.Р., С.А., 1988-жылы туулган Т.Ф., 1983-жылы туулган И.А. жана 1985-жылы туулган А.А. аттуу окуянын катышуучуларын аныктап, тергөө кызматына жеткирди.

Окуяга катышкандардын аракетине юридикалык баа берүү үчүн тиешелүү тергөө иштери жүргүзүлүп жатат дешти милициядан.