Министрликтеги чугун батареяларын уурдоого аракет кылгандар кармалып калды

Бишкекте министрликтин биринде имаратка кирип, чугун батареяларын уурдоого аракет кылгандар кармалды. Бул туурасында ИИМдин маалыматында айтылат.

Такталгандай, 8-августка караган түнү ИИМдин Күзөт кызматына Бишкек шаарында жайгашкан министрликтердин биринин нөөмөтчүсү телефон чалган. Ал имараттын ичинде 3-4 чоочун адам жүргөнүн билдирген.

Жерине атайын топ барып, Mercedes Benz унаасын текшергенде багажынан министрликке тиешелүү чугун батареялар алынган. Уурулукка шектелип 1973-жылы туулган Р.Г., 1991-жылы туулган А.А., 1990-жылы туулган Т.В., 1972-жылы туулган Ш.М. кармалып, тергөө кызматына өткөрүлүп берилген.