Депутат Бишкек, Ош шаарларында мамлекеттик ипотеканы берүүнү жандантууну сунуштады
Жогорку Кеңештин жыйынында депутат Дастан Бекешев Бишкек менен Ош шаарларында мамлекеттик ипотека берилбей, токтоп калганын айтып, ишти жандантууну сунуштады.
Айтымында, жарандар жаңы салынып жаткан үйлөрдү курулушу аяктаганга чейин күтүп, кезек менен үй алышат. Бирок үйлөрдүн курулушу узакка созулуп жатат.
"Бирок ал үйлөр качан курулуп бүтөт, азырынча белгисиз. Менин балдарым курулуп жаткан үйлөрдү көрүп келишти, эч нерсе даяр эмес, аябай жай иштеп жатышат.
Мен Бишкек менен Ошто ипотека берүүнү сунуштайм.
Көптөгөн мугалимдер, дарыгерлер, социалдык кызматкерлер, өрт өчүрүүчүлөр жана башка мамлекеттик жана мамлекеттик эмес жумушта иштеген жарандар үйгө муктаж. Эгер адамда үй жок болсо, ою ошондо гана болот. Ипотека берүүнү баштайлы. Баарын токтотуп коюп, күткүлө деген болбойт. Мен угуп жатам, ипотекалык үйлөрдүн көбү укук коргоо органдарынын кызматкерлерине берилет экен. Бул туура эмес. Бизде жөнөкөй жарандар да бар", - деди ал.
