Бишкекте жеңил унаалар кагышып, аял менен бала каза болду
Бишкекте жол кырсыгынан аял менен 11 жаштагы бала каза болду. Милициянын кайгуул кызмат башкармалыгынан маалымдашкандай, дагы 3 адам жаракат алышкан.
Окуя 17-октябрда саат 23:30 чамасында Масалиев менен Бакаев көчөлөрүнүн кесилишинде болгон.
1989-жылы туулган И. уулу Д. Hyundai Sonata унаасы менен баратып жолдун кесилишинен 2004-жылы туулган А.И.нин башкаруусундагы Toyota Yaris менен кагышкан.
Жол кырсыгынын кесепетинен Hyundai Sonata унаасынын жүргүнчүлөрү - 1990-жылы туулган А.А. шаардык оорукананын жандандыруу бөлүмүндө, ал эми 2013-жылы туулган Э.Э. балдар ооруканасында каза болгон. Ошондой эле ар кандай жаракаттар менен айдоочулар И. уулу Д., 2004-жылы туулган А.И. жана 2010-жылы туулган С.А. аттуу жүргүнчү аймактык ооруканага жеткирилген.
Бул факты боюнча тиешелүү экспертизалар дайындалып, унаалар айып короосуна токтотулду. Тергөө иштери уланууда.
