"75чилердин каты" боюнча ачык отурумда видео тартууга уруксат берилди
Бүгүн, 15-июнда Бишкектин Биринчи Май райондук сотунда "75чилердин иши" деп аталган кылмыш иши боюнча ачык сот отуруму өтүп жатат.
Айыпталуучулар арасында УКМКнын мурдагы төрагасы Камчыбек Ташиев, экс-башкы прокурор Курманкул Зулушев, Жогорку Кеңештин мурдагы төрагасы Нурланбек Тургунбек уулу, ошондой эле Бекболот Талгарбеков, Курсан Асанов, Курманбек Дыйканбаев, Аалы Карашев жана Эмилбек Узакбаев бар.
Отурумдун жүрүшүндө адвокат Чынара Жакупбекова жана башка жактоочулар журналисттерге сот залында фото жана видео тартууга уруксат берүү өтүнүчүн жасашты. Адвокат Икрамидин Айткулов сот жараянын интернет аркылуу түз алып көрсөтүүгө да уруксат берүүнү суранды.
Айыпталуучулар жактоочулардын өтүнүчүн колдошту. Атап айтканда, Курсан Асанов сот процессинин ачык өтүшүн колдой турганын билдирип, түз эфирге уруксат берүүнү өтүндү. Курманбек Дыйканбаев дагы бул сунушту колдоп, иш акыйкат каралат деген үмүтүн билдирди. Калган айыпталуучулар, анын ичинде Ташиев, Зулушев жана Тургунбек уулу да өтүнүчтү колдошту.
Ал эми мамлекеттик айыптоочулар буга каршы чыгып, соттук териштирүүнүн алкагында аудио жана видео жаздыруу жүргүзүлүп жатканын белгилешти.
Тараптарды уккандан кийин төрагалык кылуучу судья Азирет Медеров сот залында видео тартууга уруксат берди. Ошол эле учурда сот жараянын түз алып көрсөтүү боюнча маселе ачык бойдон калды.
Белгилей кетсек, буга чейин жабык эшик артында өтүп жаткан сот жараяны бүгүндөн баштап ачык форматта жүргүзүлүүдө.
