"75чилердин каты". Жактоочулар сотту кайра жабык режимде өткөрүүнү сунушташты
Бүгүн, 18-июнда Бишкектин Биринчи Май райондук сотунда "75чилердин каты" деп аталган кылмыш иши боюнча соттук териштирүү уланды.
Бир катар адвокаттар соттук процессти кайрадан жабык режимде өткөрүү мүмкүнчүлүгүн кароону сунушташты.
"Журналисттер айыпталуучуларга өтө жакын келип жатышат. Процесс башталганына 15 мүнөт болсо да, журналисттер менен болгон тартыштардан улам соттук отурум иш жүзүндө баштала элек", - деди жактоочулардын бири.
Өз кезегинде судья Азирет Медеров соттук отурум аяктагандан кийин бардык журналисттерди кабинетине чакырып, мындан аркы иш алып баруу тартибин талкуулоону сунуштады.
Иштин чоо-жайы: Камчыбек Ташиев 2026-жылдын 10-февралында Министрлер кабинетинин төрагасынын орун басары, УКМКнын төрагасы кызматынан бошотулган. Кийинчерээк ага карата "75чилердин каты" боюнча кылмыш иши козголгон. Ташиев бийликти күч менен басып алууга даярданган жана кызматтык абалынан кыянаттык менен пайдаланган деп айыпталууда. Аны менен бирге бул иш боюнча дагы жети адам - Курманкул Зулушев, Нурланбек Тургунбек уулу, Бекболот Талгарбеков, Курсан Асанов, Курманбек Дыйканбаев, Аалы Карашев жана Эмилбек Узакбаев жоопкер катары өтүүдө.
