Садыр Жапаров Максат айылындагы социалдык объектилерди текшерип, топ ойноду (сүрөт)
Бүгүн, 27-августта, Садыр Жапаров ушул жылдын апрель айында мамлекеттик чек аранын кыргыз-тажик тилкесинде болгон окуялар учурунда бузулган Максат айылындагы калыбына келтирилген социалдык объектилер менен таанышты. Бул тууралуу президенттик аппараттын маалыматтык саясат бөлүмү билдирди.
Президент жаңы аймактык милиция бөлүмүнө, фельдшердик-акушердик пунктка, футбол аянтчасына жана калыбына келтирилген орто мектепке барды.
Мамлекет башчысына ошондой эле айылды таза ичүүчү суу менен камсыздоо, жолдун 11 км тилкесине асфальт төшөө, көчөлөрдү жарыктандыруу, муздак жана ысык суу менен жабдуу системалары жана курулуп жаткан мектепке чейинки билим берүү мекемеси тууралуу айтылды.
Футбол талаасына жана калыбына келтирилген мектептин спорт залына болгон иш сапарында Жапаров балдар жана жергиликтүү жаштар командасынын мүчөлөрү менен символикалык түрдө футбол жана волейбол ойноду.
Андан кийин президент жергиликтүү тургундар менен баарлашып, жакынкы айылдардын аксакалдары менен сүйлөштү.
