Аба-ырайына байланыштуу Сосновкада унаалардын өтүүсү чектелүүдө
Туруксуз аба-ырайына байланыштуу Сосновка транспорттук көзөмөлдөө пунктунда жүк ташуучу унаалар үчүн чектөө киргизилген.
Кыргызгидромет берген маалыматка ылайык, 14-мартта республиканын көпчүлүк аймактарында жаан-чачын болуп, кардын жаашы күтүлүүдө. Ошого байланыштуу, ДЭУ-9дун кызматкерлери 13-мартта эле Бишкек - Ош автожолундагы карды тазалап, инерттик материалды себишкен.
Ошондой эле, бүгүн, Бишкек - Ош автожолунда, тоннелдин түштүк тарабында, 150 м3 көлөмүндө кар көчкү түшүп, учурда трассаны тазалоо иштери жүрүп жатат. Унаалар жолдун бир тарабы менен өтүүдө.
Транспорт министрлиги аба-ырайына байланыштуу чоң жүк ташуучу унаалардын айдоочуларынан жол жүрүүдөн баш тартууну сунушташат. Андан тышкары, кардын басып калуусун алдын алуу максатында, унаалардын ортосунда 500 метрден кем эмес аралыкты сактоо зарыл.
