Баткенде 15 суткага камалган жаран милициялар кыйноого алганын айтты
Баткенде 15 суткага камакка алынган жаранды милиция кызматкерлери кыйноого алган. Бул туурасында жабырлануучу өзү Кыйноолорду алдын алуу боюнча улуттук борборго билдирген.
Маалым болгондой, 1977-жылы туулган Д.А аттуу жаран мыйзамсыз кармалганын, 2 күн милиция кызматкерлеринин иш бөлмөсүндө отурганын айткан. Ал аз келгендей ички иштер башкармалыктын жетекчиси, анын орун басары жана ыкчам кызматкери тарабынан кыйноого алынган. Жабырлануучуга карата 4-сентябрга чейин 15 суткага камакка алуу түрүндөгү баш коргоо чарасы тандалган.
"Арыз боюнча УКМКнын кызматкерлери Баткен шаардык ички иштер башкармалыгына барышып, кармалган адамдын көкүрөгүнөн, далысынан жана колдорунан ур-токмоктун изин аныкташты. Бул окуя боюнча материал прокуратурага өткөрүлүп берилет", - дешет Кыйноолорду алдын алуу боюнча улуттук борбордон.
