Садыр Жапаров Астана шаарындагы жогорку деңгээлдеги эл аралык иш-чараларга катышат
Президент Садыр Жапаров 12-14-октябрда Казакстандын Астана шаарындагы бир катар жогорку деңгээлдеги эл аралык иш-чараларга катышат. Бул тууралуу президенттин администрациясынын тышкы саясат бөлүмүнүн башчысы Муратбек Азымбакиев билдирди.
"Иш сапардын алкагында 13-октябрда мамлекет башчы Азиядагы өз ара аракеттенүү жана ишеним чаралары боюнча кеңешменин 6-саммитине катышат. 14-октябрда ал Көз карандысыз мамлекеттер шериктештигинин мамлекет башчыларынын кеңешинин кезектеги жыйынына катышат. Ошол эле күнү Садыр Жапаров "Борбор Азия – Россия" форматындагы 1-саммитке катышат.
Астана шаарындагы эл аралык иш-чаралардын алкагында өлкө лидерлери Азия регионундагы коопсуздук жаатында кызматташуу, КМШ алкагында соода-инвестициялык өнөктөштүк, "Борбор Азия – Россия" форматында өз ара аракеттенүүнүн келечегин талкуулашат", - деп билдирди Азымбакиев.
