"Уят го". Шайлообек Атазов TikTok сервисине бөгөт коюуну сунуштады
Жогорку Кеңештин жыйынында депутат Шайлообек Атазов TikTok социалдык тармагына бөгөт коюуну сунуштады. Айтымында, бул сервис жаштарды жаман жакка бурат.
"Маданият, маалымат министрине тапшырма берип, TikTok`тун жаман жакка буруп жатканы боюнча иш алып барбайсыңарбы? Уят го эми. Үй-бүлө менен кантип көрүп жатат? Биздин мамлекеттин улуттук баалуулуктары, саясаты да болушу керек да. Ошону карап жаткан тармак эмне кылып жатат? Өзбекстан менен Казакстанда жок го. Ушуга көңүл буруп койсоңуздар", - деди ал.
Белгилей кетсек, Өзбекстанда TikTok 2021-жылы бөгөттөлгөн. Бирок ага "Жеке маалыматтар жөнүндө" мыйзамдын бузулушу себеп болгон. Казакстанда социалдык тармакка тыюу салынган эмес.
Буга чейин TikTok`ту жабууну депутаттар Жаныбек Кыдыкбаев, Надира Нарматова сунуштаган.
