Кадыр Досоновдун кылмыштуу тобунун дагы эки мүчөсү кармалды

Ошто опузалап акча каражатын талап кылган деген шек менен эки жаран кармалды. УКМКнын маалымат кызматынан билдиришкендей, кармалгандар кримтөбөл Дженгонун уюшкан кылмыштуу тобунун мүчөлөрү.

Белгилүү болгондой, алар Ош облусунун тургунунан 14 миң 500 доллар акча талап кылып, тергөө органдарынан жашырынып жүрүшкөн. УКМКнын Ош облустук жана Ош шаардык башкы башкармалыгы тарабынан Г.У.Н. жана Н.А.А. аттуу кармалып, убактылуу кармоочу жайга киргизилди.

Алар мурда "каракчылык" беренеси боюнча бир нече жолу соттолуп, Жазаларды аткаруу кызматынын №43-колониясында каттоодо турушкан. Ошондой эле Н.А.А. колонияга каттоого туруктуу келбегендигине байланыштуу ИИМ тарабынан издөөдө жүргөн.

Азыркы учурда кармалгандардын мындан башка кылмыштарга тиешеси бар, жогу текшерилүүдө.

Бул фактыга шектелип буга чейин Э.А.А. жана Ж.С.Т. кармалган.