Ат-Башы районуна киргизилген өзгөчө кырдаал режими алынды
Нарын облусунун Ат-Башы районуна киргизилген өзгөчө кырдаал режими бүгүн, 5-майда алынды. Өзгөчө кырдаалдар министрлигинин Нарын облустук башкармалыгынан аба-ырайы турукташып, жааган карлар ээрип, малчыларга жана мал-жандыктарга болгон коркунуч жоюлгандыгын билдиришти.
Белгилей кетсек, 2-3-май күндөрү аба ырайы кескин өзгөрүп, калың жааган кардын кесепетинен Ат-Башы районундагы жайлоо-кыштоолордо мал-жандыктар тоютсуз калышкан. Жерине жергиликтүү бийлик өкүлдөрү менен биргеликте жем, чөп жеткирилген.
3-майда Арпа өрөөнүндөгү Ак-Бейит, Беш-Сары, Ичке, Кемесия тилкелеринде калган малчыларга ыкчам жардам көрсөтүү жана кырдаалды жөнгө салуу максатында Ат-Башы райондук администрациясынын башчысынын буйругунун негизинде 3-майдан тарта райондун аймагына өзгөчө кырдаал режими убактылуу киргизилген.
