Акыйкатчы кызматына Канымбү Карабаева талапкер болду
"Ишеним" фракциясы Кыргыстандын акыйкатчысы кызматына Канымбү Карабаеванын талапкерлигин көрсөттү. Маалыматты Kaktus.media сайтына Жогорку Кеңештеги өздүк булактар билдиришти.
Буга чейин "Альянс", "Ынтымак" фракциялары жана "Келдик" депутаттык топ акыйкатчы кызматына экс-депутат Мирлан Жеенчороевди талапкер көрсөтүшүп, документтерди тармактык комитетке жөнөткөн.
Канымбү Карабаева 1972-жылы Сузак районунун Барпы айылында туулган. Ош мамлекеттик университетинин юриспруденция адистигин аяктаган.
Эмгек жолу:
1993-2000-жылдары - Жалал-Абад облустук юстиция башкармалыгында аппарат жетекчиси, андан кийин шаардык ЗАГСтын башчысы;
2008-2010-жылдары - Жалал-Абад облусунун Кара-Көл шаарынын жана Сузак районунун социалдык коргоо бөлүмүнүн башчысы;
2010-2011-жылдары Жогорку Кеңештин юрист-консультанты.
Мындан тышкары Жалал-Абад мамлекеттик университетинде окутуучу болуп иштеген, 2011-жылы Жогорку Кеңештин көпчүлүк коалициясынын өкүлү катары Сотторду тандоо кеңешинин мүчөсү болгон.
2021-жылы Жогорку Кеңештин депутаттыгына "Ишеним" партиясынан ат салышкан.
Эске салсак, 3-майда Жогорку Кеңештин депутаттары Атыр Абдрахматованы Акыйкатчы кызматынан бошотушкан.
