Бүгүндөн баштап "Салык чек" лотереясынын байгелери ойнотула баштайт
Мамлекеттик салык кызматынын "Чек талап кыл – байге утуп ал!" лотереясы бүгүн, 26-июндан баштап байгелерди ойното баштайт. Утуштар саат 14:00дө Салык кызматынын Facebook жана YouTube баракчаларынан түз эфир аркылуу ойнотулат.
Оюндун биринчи этабында 1183 баалуу байге: 10 электромобиль, Дубайга эки кишилик 3 жолдомо, 500 iPhone-14, 500 смартфон, 150 ноутбук жана 20 Dyson бар.
26-июндан 30-июнга чейин 1170 утуштун тираждары Салык кызматынын Facebook баракчасында жана YouTube каналында түз эфирде көрсөтүлөт. Күн сайын 234 адам баалуу байгелердин ээлери болушат.
Негизги иш-чара 1-июлда "Ала-Тоо"аянтында өтүп, анда супер байгелер – он электромобиль жана чет өлкөгө жолдомолор ойнотулат.
Лотерея оюну кызыктуу шоу-программа жана эстрада жылдыздарынын катышуусундагы чоң концерт менен коштолот. Аянттагы көрүүчүлөргө жагымдуу белектер берилет дешет Салык кызматынан.
Белгилесек, оюндун экинчи тиражы ушул жылдын 30-декабрында болот.
