Ошто ресторандын кызматкерлерине шек келтирген жаран 3 суткага камалды
Ошто ресто-бардын кызматкерлеринин абийирине шек келтирген жаран кармалып, 3 суткага камакка алынды. Бул тууралуу Ош ШИИБден кабарлашты.
Такталгандай, 5-январга караган түнү 03:00 чамаларында Ош шаарындагы "Эне-Сай" ресторанынын ресто-барында туулган күн белгилеп отурган Р.Ж. аталган ресто-бардын кызматкерлерине зомбулук көрсөтүп, абийирине шек келтирген сөздөрдү айтып, сөгүп коомдук тартипти бузган. Мындан улам кызматкерлер арыз менен милицияга кайрылышкан.
Факты боюнча 126-берене (майда бейбаштык) боюнча кылмыш иши козголуп, Р.Ж. кармалган. 23-январда Ош шаардык соту тарабынан 1993-жылы туулган Р.Ж. күнөөлү деп табылып, 3 суткага камакка алуу чечимин чыгарды.
Айыпталуучу мурда кылмыш жоопкерчилигине бир нече жолу тартылган, ИИМдин атайын тизмесинде уюшкан кылмыштуу топтун мүчөсү катары турат.
