Айтурган Маматкулованын өлүмү боюнча күйөөсү кармалды
26 жаштагы Айтурган Маматкулованын резонанс жараткан өлүмүнө байланыштуу анын күйөөсү кармалды. Бул тууралуу адвокат Жанатбек Гүлжигитов билдирди.
Жактоочунун маалыматына караганда, келиндин күйөөсү "өзүн-өзү өлтүрүүгө жеткирген" деп шектелип, 2 суткага камакка алынды.
Ал эми Октябрь РИИБден келиндин күйөөсү кармалганын ырастап, буларды билдирди.
"Иликтөө иштеринин жүрүшүндө чогултулган жана аныкталган фактылык маалыматтардын негизинде милиция кызматкерлери тарабынан 1998-жылы туулган Н.Т. тергөө кызматына жеткирилген. Кылмыш-процессуалдык кодексинин 96-беренесине ылайык, шектүү Бишкек ШИИББдин убактылуу кармоочу жайына киргизилди. Учурда тергөө иштери уланууда", - дешти милициядан.
Белгилесек, Айтурган Маматкулова 7-июлда ооруканалардын биринде каза болгон. Дарыгердин алгачкы корутундусуна ылайык, келин дары-дармекке ууланганын Октябрь РИИБден билдиришкен. Жолдошу келин өзүн-өзү өлтүргөн деген версияны айткан. Бирок келиндин жакындары Айтурган киши колдуу болгон деп эсептешет.
12-июлда Бишкек шаардык Октябрь РИИБи тарабынан Кылмыш-Жаза кодексинин 128-беренеси (Өзүн-өзү өлтүрүүгө жеткирүү) боюнча кылмыш иши козголгон.
