Айтурган Маматкулованын өлүмүнө шектүү камакка алынды
26 жаштагы Айтурган Маматкулова аттуу келиндин өлүмүнө шектелип кармалган күйөөсү камакка алынды. Маалыматты редакцияга жактоочу Жанатбек Гүлжигитов билдирди.
Маалым болгондой, бүгүн, 1-сентябрда Октябрь райондук соту шектүүнүн бөгөт чарасын карады. Соттун чечими менен келиндин күйөөсү 30-октябрга чейин камакка алынды.
Белгилесек, Айтурган Маматкулова 7-июлда ооруканалардын биринде каза болгон. Дарыгердин алгачкы корутундусуна ылайык, келин дары-дармекке ууланганын Октябрь РИИБден билдиришкен. Жолдошу келин өзүн-өзү өлтүргөн деген версияны айткан. Бирок келиндин жакындары Айтурган киши колдуу болгон деп эсептешет.
12-июлда Бишкек шаардык Октябрь РИИБи тарабынан Кылмыш-Жаза кодексинин 128-беренеси (Өзүн-өзү өлтүрүүгө жеткирүү) боюнча кылмыш иши козголгон. Август айынын аягында шектүү катары Айтурган Маматкулованын күйөөсү - 1998-жылы туулган Н.Т. кармалган.
