Бишкекте коомдук транспортто уурулук кылган топ кармалды. Видео

Бишкек ШИИББдин ыкчам кызматкерлери коомдук транспортто жүргүнчүлөрдүн буюмдарын уурдоого аракет кылган топту кармады.

Белгилесек, 12-августта интернетте коомдук транспорттун салонунда бейтааныш адамдар жүргүнчүлөрдү отвертка менен коркутуп жаткан видео тараган. Мындан тышкары 10-августта шаар тургуну бейтааныш адамдарга чара көрүү арыз менен кайрылган. Арызында көрсөтүлгөн күнү саат 08:20 чамасында Киев көчөсү менен коомдук транспортто бара жатып, капчыгын уурдоого аракет кылганын, капчыкты ала албай калган соң, баласына жаракат келтиргенин билдирген.

10-августта дагы бир жаран милицияга кайрылып, 8-августта маршруттук таксинин салонунда бара жатып, Redmi 7 маркасындагы уюлдук телефонун уурдатып жибергенин байкап, кайтарууга аракет кылганда, белгисиз адамдар каршылык көрсөтүп, урууга аракет кылышканын айткан.

Айтылган фактылар боюнча райондук бөлүмдөрдүн тергөө кызматтары тарабынан 207-берене (каракчылык) боюнча кылмыш иштери козголгон. Ыкчам-иликтөө иш-чараларынын жүрүшүндө Бишкек ШИИББдин ыкчам кызматкерлери чөнтөкчүлөрдү кармап, тергөө кызматына жеткиришкен.

Алар мурда бир нече жолу соттолгон 1994-жылы туулган К.Ж., 2005-жылы туулган А.Р., 2006-жылы туулган М.Д., 2005-жылы туулган О.И., 2001-жылы туулган Ж.К. жана 1998-жылы туулган Ч.М. аттуу жарандар экени аныкталган. Кармалгандар убактылуу кармоочу жайга киргизилди. Ал эми 2006-жылы туулган шектүүнү камакка алуу түрүндөгү баш коргоо чарасы Чүй районунун Вознесеновка айылындагы №14 түзөтүү колониясына тандалган.

Жүргүзүлгөн кылмыш ишинин алкагында милиция кызматкерлери тарабынан кылмышка шектүүлөрдүн жашаган жеринен ар кандай үлгүдөгү 6 уюлдук телефон табылган.