"Биздин да кайгыбыз". Садыр Жапаров Кыргызстандагы түрк элчилигине барып көңүл айтты
Президент Садыр Жапаров бүгүн, 9-февралда Түркиянын Кыргызстандагы элчилигине барып, жер титирөөлөрдүн кесепетинин курмандыктарына байланыштуу түрк элине көңүл айтты.
Мамлекет башчысы көңүл айтуу китебине жазуу калтырып, анда Кыргызстан элинин жана жеке өзүнүн атынан боордош түрк элине көңүл айтып, колдоосун билдирди.
Кыргыз Республикасы, табияттын татаал кырсыгына кабылып, башына каран түн түшүп турган боордош Түркия элинин кайгысын тең бөлүшөт, деп белгиледи.
Сиздердин кайгыңыздар – биздин да кайгыбыз!
Биздин жүрөгүбүздө түрк элинин, Түркиянын орду чоң. Кыргыз эли, ата-бабаларыбыздан салт болуп келаткандай, тарыхы менен тамыры бир түрк эли үчүн, башыңыздарга кандай күн түшпөсүн, жөлөк-таяк, арка-бел болууга ар дайым даяр.
Жалпы Кыргызстан элинин жана жеке өзүмдүн атымдан каза болгон боордошторубуздун жакындарына жана туугандарына терең кайгыруу менен көңүл айтам. Жер титирөөдөн жараат алгандардын тез арада сакайып кетишин тилеймин!" - деп жазды Садыр Жапаров.
