Түркиядагы зилзалада курман болгон Медина Бактачиеванын артында баласы калды
Түркиядагы катуу жер титирөөдөн курман болгон Медина Бактачиеванын сөөгү жерге берилди. Муфтияттан кабарлашкандай, акыркы сапарга узатуу зыйнаты Токтогул районунун Кызыл-Өзгөрүш айылында өттү.
Коштошуу зыйнатына Жалал-Абад облусунун ыйгарым укуктуу өкүлүнүн орун басары Маматаев Эркинбек баштаган райондук жана жергиликтүү бийлик өкүлдөрү, Жалал-Абад облусунун мусулмандарынын казысы Нематулла ажы Жээнбеков жана дин кызматкерлери катышты.
Нематулла ажы Жээнбеков каза болгон кыргызстандык Медина Бактачиеванын үй-бүлөсүнө облустук казыяттын атынан 30 миң сом акчалай жардам тапшырды.
Медина Бактачиева Түркияда жашап эмгектенип жүргөн. Ал 6-февралда катталган зилзаланын курмандыгы болгон. Анын артында 1 уулу калды. Эне-бала 6 жылдан бери көрүшө электигин айылдаштары айтты.
