Түркияда кайрадан жер титирөө катталып, 1 адам каза болду
Бүгүн, 27-февралда Түркиянын Малатья провинциясында күчү 5,6 баллга жеткен жер титирөө катталды. Anandolu агенттиги жазган маалыматка ылайык, зилзала жергиликтүү убакыт боюнча саат 12:04тө катталган.
Жер титирөөнүн очогу Йешилюрт аймагында жайгашкан.
Түркиянын Кырсыктарды алдын алуу жана жардам көрсөтүү башкармалыгы (AFAD) жер титирөөнүн кесепетинен 25 үйдүн урап калганын билдирди. Ошондой эле 1 киши каза болуп, 69 адам жабыркаганы маалымдалды.
Учурда кырсык болгон аймакта куткаруучулар иш алып барышууда.
Эске салсак, 6-февралда Түркиянын түштүк-чыгышында күчү жети баллдан ашкан эки жер титирөө болгон (жергиликтүү убакыт боюнча саат 04:17де – 7,7 балл жана 13:24тө – 7,6 баллга жеткен). Жер титирөө Сирия, Ливан, Түндүк Кипр, Грек Кипр жана Ирак сыяктуу коңшу өлкөлөрдө да сезилген.
Андан кийин дагы Түркиянын аймактарында жер титирөөлөр катталган.
