Кыргызстандык куткаруучулар Түркиядан эртең кайтып келишет
Түркиядагы жер титирөөнүн кесепеттерин жоюуга көмөктөшкөн кыргызстандык куткаруучулар өлкөгө кайтып келишет. Өзгөчө кырдаалдар министрлигинен кабарлашкандай, куткаруучулар отурган учак аба майданга 21-февралда конот.
Белгилүү болгондой, куткаруучулар Бишкек убактысы боюнча түнкү саат 02:35да жана таңкы 09:00дө "Манас" эл аралык аэропортуна конушат.
Кырсык катталган аймакта 24 саат иштеп, түрк элинин кайгысын тең бөлүшүп, аларга жардам берген куткаруучуларды тосуп алуу иш-чарасы уюштурулат дешет министрликтен.
Эске салсак, Түркиядагы жер титирөөнүн эртеси күнү, 7-февралда Кыргызстандан 67 куткаруучу жана издөө иштерине үйрөтүлгөн 2 ит жөнөтүлгөн. 12-февралда 80 куткаруучу, 3 дарыгер жана 78 боз үй менен боз үй тигүүчүлөр Түркияга жөнөтүлдү.
13-февралда өзгөчө кырдаалдар министри Бообек Ажикеевдин жетекчилиги менен 35 адам, анын ичинде 3 дарыгер, 3 боз үй тигүүчү, куткаруучулар учуп кетишкен.
