Кыргызстанга дагы бир тик учак сатып алынды. Президент сыноодон өткөрдү (сүрөт)
Кыргызстан Airbus H145 жаңы тик учак сатып алды. Президенттин маалыматтык саясат бөлүмүнүн башчысы Дайырбек Орунбеков билдиргендей, бул экинчи учак.
Белгилүү болгондой, Садыр Жапаров бүгүн, 11-декабрда Кыргызстанга келген экинчи жаңы Airbus H145 тик учагына отуруп, сыноодон өткөрдү.
Airbus H145 эң акыркы навигация жабдуулары, автопилот, TAS 620 жолдогу жагдайды эскертүү системасы, кошумча абаны тазалоо системасы жана башкалар менен жабдылган.
- Тик учак республикалык бюджеттин эсебинен Германиядан сатып алынды жана Өзгөчө кырдаалдар министрлигинин балансына өткөрүлдү.
- Жаңы техниканы колдонуу кырсыктардын алдын алууга жана алардын кесепеттерин жоюуга, ошондой эле өзгөчө кырдаалдарга чара көрүү убактысын кыскартууга мүмкүндүк берет.
- Ошол эле учурда жеке жана юридикалык жактар да бул тик учакта белгиленген төлөм менен коммерциялык максатта уча алышат. Бул максаттан түшкөн каражат өлкөнүн бюджетине түшөт.
Келерки жылы Кыргызстан менен Россиянын лидерлеринин макулдашуусунун алкагында өлкөгө Өзгөчө кырдаалдар министрлиги үчүн жаңы МИ-8 МТВ маркасындагы тик учак гранттык негизде келери күтүлүүдө.
Мындан тышкары учурда Коргоо министрлигинин тик учактарын капиталдык оңдоо иштери аяктап жатат. Муну менен Кыргызстанда вертолеттук авиация тармагынын өсүүсү уланууда.
Президент Садыр Жапаров тиешелүү техникалар менен камсыздоо иш-чаралары муну менен эле токтоп калбай, бул багыттагы иштер улантыла турганын билдирди.
Эске салсак, 2022-жылдын августунда өлкөнүн Өзгөчө кырдаалдар министрлигине жаңы атайын техникалар тапшырылган, анын ичинде төрт жүргүнчү орунга эсептелген Airbus H-125 дагы болгон.
