Авариялык абалда. Бишкекти Таш-Дөбө жана башка айылдар менен байланыштырган көпүрө жабылды
Бишкектин түштүк тарабындагы көпүрө кооптуу деп табылып, унаа кыймылына чектөө киргизилди. Көпүрө Бишкекти Таш-Дөбө, Заречное, Чоң-Таш, Бир-Булак жана башка айылдар менен байланыштырат.
Транспорт жана коммуникациялар министрлиги көпүрөнүн жабылышы боюнча маалымат берди. Мекемеден 1 күн аралыгында Аламүдүн-Кой-Таш-Арашан унаа жолундагы авариялык көпүрөнү айланып өтүүчү каттам берилерин айтышты.
"Аталган көпүрө Аламүдүн районунун Таш-Дөбө айыл өкмөтүнө караштуу Заречная айылындагы Аламүдүн-Арашан-Кой-Таш унаа жолунун 0+150 чакырымында жайгашкан.
Көпүрө 2021-жылы "Кыргыздортрансдолбоор" институтунун тиешелүү кызматкерлери тарабынан текшерүүдөн өткөрүлүп, авариялык абалда экени аныкталган. Ага долбоор түзүлүп, мамлекеттик экспертизага жиберилген.
Бүгүнкү күндө №25 Жол тейлөө ишканасы тарабынан аталган көпүрөдө каттам жабылып, тиешелүү иш-чаралар башталды. Унааларга убактылуу Байтик-Дача-Воронцовка айылдары аркылуу альтернативдик каттам камсыз кылынды.
Аламүдүн-Кой-Таш-Арашан унаа жолунда бир күн ичинде көпүрөнү айланып өтүүчү жол салынып каттам берилет. Учурда керектүү техникалар тартылды", - дешти министрликтен.
