ММК: Месси карьерасын "Аль-Хилалда" улантат. Футболчунун аялы мындай кадамына каршы
"Алтын топтун" 7 жолку ээси, ПСЖнын чабуулчусу Лионель Месси карьерасын Сауд Аравиянын "Аль-Хилал" клубунда улантат. Тараптар макулдашууга жетишкендигин дүйнөлүк маалымат агенттиктеринин Associated Press жана AFP маалымат булактары билдирди. Келишимге сезондун аягында кол коюлат.
ММКлар "Аль-Хилал" клубу Мессини чакыруу үчүн бардык аракеттерди көрүп жатканын бир нече жолу жазышкан, анткени "Аль-Наср" мурда Криштиану Роналду менен келишим түзгөн. Тактап айтканда, аргентиналык футболчуга бир сезондо 400 миллион евро маяна менен келишим сунушталган.
Ошол эле маалда франциялык L'Equipe басылмасынын маалыматына караганда, Мессинин саудиялык клубга өтүшүнө жубайы Антонелла Рокуццо каршы экени айтылууда. Булактын айтымында, футболчунун жубайы үч кичинекей баласы менен Сауд Аравияга көчкүсү келбейт. Футболчунун өзү чечим кабыл алууда жай аракеттерди көрүүдө, анткени ал Европада калууну пландап жатат.
Месси ПСЖга 2021-жылдын августунда кошулган. Кристоф Галтиердин командасы үчүн бул сезондо ал 37 матч өткөрүп, 20 гол киргизип, 19 пас берген. 35 жаштагы футболчунун париждиктер менен келишими учурдагы сезондун аягында аяктайт.
Жакында эле париждиктер Мессини Сауд Аравияга уруксатсыз барганы үчүн эки жумага команда менен машыгуудан четтеткен. Дээрлик бир жумадан кийин ПСЖ эл алдында кечирим сурагандан кийин оюнчуга машыгууга уруксат берген.
