"75чилердин каты" боюнча айыпталгандардын декларациясы. Эмнелер конфискация болушу мүмкүн?
3-июлда Бишкектин Биринчи Май райондук соту "75чилердин каты" боюнча өкүм чыгарды.
"Бийликти күч менен басып алуу" беренеси боюнча күнөөлүү деп табылгандар:
- Камчыбек Ташиев;
- Курманкул Зулушев;
- Нурланбек Тургунбек уулу;
- Бекболот Талгарбеков;
- Курсан Асанов;
- Курманбек Дыйканбаев;
- Аалы Карашев;
- Эмил Узакбаев.
Баары төрт жылга эркинен ажыратылып, мүлкү конфискацияланды. Ал эми "Кызмат абалынан кыянаттык менен пайдалануу" боюнча күнөөсүз деп табылды. Сот айыпталуучуларды шарттуу түрдө бошотту. Бирок Ташиев менен Зулушевдин жактоочулары соттун өкүмүнө каршы экенин, жогорку инстанцияга кайрыларын билдиришти.
Kaktus.media соттолуучулардын декларацияларын карап чыкты. Эгер шаардык сот баштапкы чечимди күчүндө калтырса, айыпталуучулар кандай мүлктөрүнөн кол жууп калышы мүмкүн?
Камчыбек Ташиев
Камчыбек Ташиев Улуттук коопсуздук мамлекеттик комитеттин башчысы катары декларация тапшырганы менен Салык кызматы аны ачык жарыялаган эмес.
Kaktus.media сайтына белгилүү болгондой, УКМКнын кызматкерлери мыйзамда каралгандай киреше жана чыгаша декларацияларын тапшырууга милдеттүү. Бирок "КРнын Улуттук коопсуздук органдары жөнүндө" мыйзамына ылайык, УКМК бул маалыматты коомчулукка жарыялабайт. Демек, Ташиевдин 2020-2025-жылдардагы мүлкү жөнүндө маалымат жок дегенди билдирет.
2010-жылы Ташиев "Ата-Журт" фракциясынан Жогорку Кеңештин депутаты болгон. Ал ошол кезде декларация тапшырган. Ташиевдин депутат катары расмий кирешеси 2012-жылы 856 846 сомду түзгөн.
Кыймылсыз мүлк боюнча бөлүмдө Ташиев үйү, унаасы жок экенин, жалпы аянты 0,15 гектар жер тилкеси гана бар экенин көрсөткөн.
Нурланбек Тургунбек уулу
Жогорку Кеңештин мурдагы төрагасынын 2024-жылдагы декларациясы 2026-жылдын башында жарыяланган.
Салык кызматынын маалыматы боюнча, ал Нурланбек Шакиев деген ат менен документтерди тапшырган (кийинчерээк атын өзгөрткөн). Ошол учурда Шакиев 3 685 138 сом киреше таап, 1,3 миллион сом коротконун билдирген. Анын 1500 чарчы метр жер тилкеси, 96,6 чарчы метр аянттагы батири жана 6 миллион сомдук унаасы болгон. Жалпысынан 4,65 миллион сомдук бодо мал, кой жана жылкылары да бар экени көрсөтүлгөн. 1,35 миллион сомдук зер буюмдары жана 2,3 миллион сомдук башка кыймылдуу мүлкү да бар деп жарыяланган.
Курманкул Зулушев
Өлкөнүн мурдагы башкы прокурору жана парламенттин мурдагы депутаты Курманкул Зулушев дагы 2024-жылы кирешеси жана мүлкү тууралуу отчёт берген.
Башкы прокурор катары ал 12 639 134 сом киреше тапкан. Андан тышкары 0,5 гектар айыл чарба багытындагы жер тилкесин мүлк катары көрсөткөн. Анын декларациясында 2,64 миллион сомдук унаа, 70 000 сомдук эмерек, 35 000 сомдук кеңсе жабдуулары жана 15,7 миллион сомдук башка кыймылдуу мүлк да камтылган.
Ошондой эле Зулушев 13 миллион сомдук бодо малга, 12 миллион сомдук жылкыларга, андан тышкары 10 миллион сомдук күлүк аттарга ээ экенин көрсөткөн.
Курсан Асанов
КРнын мурдагы ички иштер министринин орун басары Курсан Асанов көптөн бери мамлекеттик кызматта иштеген эмес. Анын мүлкү тууралуу маалыматтарды эски декларациялардан гана тапса болот.
Мисалы, Асанов 2016-жылы 829 986 сом айлык алган. Анын башка киреше булактары жок экени баса белгиленген. Ошол учурда Асановдун 37, 38 жана 54 чарчы метрлик үч батири жана Mercedes үлгүсүндөгү унаасы болгон. Бирок 2013-жылы анын декларациясында 82 чарчы метрлик жер тилкеси көрсөтүлгөн.
Курманбек Дыйканбаев
Жогорку Кеңештин мурдагы депутаты Курманбек Дыйканбаев эл өкүлү катары өзүнүн мүлкү жөнүндө отчёт берген. 2012-жылы ал жалпы аянты 200 чарчы метр болгон үйүн жана 2005-жылкы Lexus GX-470 үлгүсүндөгү унаасын декларациялаган. 2013-жылы депутат үйгө, батирге жана ошол эле унаага ээ болгон. 2015-жылы ал 629 000 сом тапкан. Ал эми 2018-жылдагы кирешеси болжол менен 658 000 сомду түзгөн.
Аалы Карашев
Жогорку Кеңештин мурдагы депутаты жана мурдагы вице-премьер-министр өзүнүн мүлкү жөнүндө отчёт берүүгө милдеттүү болгон. Аалы Карашев 2012-жылы жалпы аянты 120 чарчы метр болгон үйгө ээлик кылганы көрсөтүлгөн.
2015-жылдагы кирешеси (Президенттик администрациянын аппарат жетекчисинин биринчи орун басары катары) 372 976 сомду түзгөн. Карашевдин унаасы болгон эмес, жалгыз кыймылсыз мүлкү - аянты 111,6 чарчы метрди түзгөн батири болгон.
Эмилбек Узакбаев
Кыргыстандын Өзбекстандагы мурдагы элчиси дагы мамлекеттик кызматкер катары кирешеси жана мүлкү жөнүндө отчёт тапшырган. 2012-жылы ал 500 000 сомдон ашык киреше тапкан, бирок жеке мүлкү болгон эмес. 2013-жылы 941 000 сом киреше тапкан. Ал ошондой эле 22 000 сом дивиденд алган. Ал өзүнүн 42,37% акциялык үлүшүн башкага өткөрүп берген.
