Байгеси 1 млн сом. Бишкекте хор коллективдери арасында сынак өтөт
Кыргыз ССРнин эл артисти, биринчи хормейстер Султан Юсуповдун 105 жылдыгына карата студенттик хор коллективдери арасында II республикалык кароо-сынак фестивалы өтөт. Улуттук маданий борбор уюштуруп жаткан сынактын байге фонду 1 млн сомду түзөт.
Аталган борбордон билдиришкендей, сынак Маданият, маалымат, спорт жана жаштар саясаты министрлигинин тапшырмасына ылайык өткөрүлөт.
Иш-чарага өлкөнүн жети облус, 2 шаарынан 600гө чукул адам (12 хор коллективи) катышат.
Кароо-сынактын тандоо туру 23-май күнү саат 11:00дө Калый Молдобасанов атындагы улуттук консерваторияда өткөрүлөт. Ал эми сыйлоо аземи 24-май күнү саат 18:00дө Тарых музейинин алдында болуп, гала-концерт менен коштолот.
Фестивалга катышкан баардык хор топтору Бишкек шаарынын конокторуна жана тургундарына концерттик программа тартуулашат. Анда кыргыз жана дүйнөлүк композиторлордун чыгармалары аткарылат.
Максаты:
- президенттин 2021-жылдын 29-январындагы "Инсандын руханий-адеп-ахлактык өнүгүүсү жана дене тарбиясы жөнүндөгү" №1 жарлыгын иш жүзүнө ашыруу;
- катышуучулардын жана көрүүчүлөрдүн хор аткаруусу жөнүндө түшүнүгүн кеңейтүү;
- хор дирижёрлорунун кесиптик баарлашуусу, тажрыйба жана репертуар алмашуу аянтчасын түзүү;
- чыгармачыл тажрыйба алмашуу жана аткаруучулук чеберчилигин өркүндөтүү;
- хор кыймылын кеңейтүү үчүн кароо-сынак фестивалынын катышуучулары менен көрүүчүлөрдүн ортосунда расмий эмес баарлашуунун атмосферасын түзүү;
- коомчулуктун хор искусствосуна болгон кызыгуусун арттыруу;
- элдик чыгармачылыкты, аткаруу чеберчиликти, улуттук маданиятты өнүктүрүүгө жана өз мүмкүнчүлүктөрүн ишке ашыруу.
