Ал мас болчу. Уулу энесин сабап өлтүргөн деп айыпталууда

Чүй облусунда аял токмок жеп каза болду. Маркумдун өлүмүнө уулу шектелип жатканын Чүй облустук ички иштер башкы башкармалыгынын басма сөз кызматы билдирди.

Маалым болгондой, 21-майда Чүй райондук ички иштер бөлүмүнө 1955-жылы туулган Б.Н.нын жансыз денеси табылгандыгы тууралуу маалымат түшкөн. Чүй районунун Искра айылындагы өз үйүнөн зомбулуктан каза болгон аялдын жансыз денеси табылды.

Шектүү. Сүрөт: Чүй облустук ички иштер башкы башкармалыгынын басма сөз кызматы

Милиция кызматкерлери бул факты боюнча кылмыш ишин козгоп, керектүү экспертизалар дайындалды. Ал эми кылмышка шектүү 1977-жылы туулган Ф.М., аялдын уулу болуп чыкты.

Тергөөнүн версиясы боюнча, кармалган жаран мас абалында апасынын денесине залал келтирип, анын кесепетинен каза болгон.

Шектүү убактылуу кармоочу жайга киргизилген. Тергөө иштери уланууда.