Азис Абакиров кайрадан Жогорку технологиялар паркын жетектеди
Азис Абакиров кайрадан Жогорку технологиялар паркынын дирекциясынын жетекчиси болду. Бул тууралуу уюмдун Facebook баракчасында маалымдалды.
Бир күн мурда Жогорку технологиялар паркынын Байкоочу кеңешинин чечими менен Абакиров дирекциянын жетекчиси болуп шайланган. Ал Жогорку технологиялар паркынын негиздөөчүлөрүнүн бири жана буга чейин аны жетектеп келген.
"Кыргыз Республикасынын Жогорку Технопаркынын мурдагы жетекчиси Чубак Темиров директордун орун басары болду", - деп белгилешти уюмдан.
Маалым болгондой, Абакиров 2002-жылы Жусуп Баласагын атындагы КУУнун чыгыш таануу факультетин (япон тили) аяктаган. Япониянын эл аралык кызматташтык агенттигинде стажировкадан өткөн.
2011-жылы Вашингтондо (АКШ) Рамсфелд атындагы фонддун "Борбордук Азиянын, Кавказдын, Афганистандын, Монголиянын жаш лидерлери" программасына катышкан.
2016-жылы Абакиров Кыргыз Республикасындагы эң мыкты Жогорку технологиялар паркынын кызматы үчүн "Аракет" улуттук сыйлыгы менен сыйланган.
2017-жылы Осакадагы (Япония) Эл аралык палата тарабынан көрүнүктүү жаш лидер катары таанылган. 2018-2019-жылдары Лондондогу Системаны өзгөртүү мектебинде окуган.
Абакиров ошондой эле Дрэйпер университетинде Силикон өрөөнүндөгү ишкердик программасы боюнча окуган. Ал IT академиясынын негиздөөчүсү.
