Ошто жасалма долларга iPhone сатып алгандар кармалды

Ош облусунда iPhone телефонун сатып алган жаран кармалды. Облустук ички иштер башкармалыгынан билдиришкендей, шектүү телефонду жасалма долларга сатып алган.

Маалым болгондой, Кара-Суу шаарынын 2006-жылы туулган тургуну милицияга арыз менен кайрылган. Анда 11-июнда белгисиз жаран 2 iPhone 14 Pro телефонун сатып алганын, акчасы жасалма экенин билдирген.

Топтолгон материалдын негизинде 233-берене (Жасалма акчаны же баалу кагаздарды жасоо) боюнча кылмыш иши козголуп, ыкчам-тергөө амалдары башталган.

Жүргүзүлгөн ыкчам издөө иш-чаралардын натыйжасында кылмышка шектүү катары Кара-Суу районунун 1994-жылы туулган Р.А. жана ИИМдин ыкчам каттоосунда уюшкан кылмыштуу топтун мүчөсү катары каттоодо турган 1992-жылы туулган Б. уулу Б. кармалып, убактылуу кармоочу жайга киргизилди.

Учурда шектүүлөрдүн башка кылмыштарга тиешеси бар, жогун аныктоо боюнча тергөө амалдары жүргүзүлүүдө.