Акылбек Жапаров: Кыргызтан Centerra Gold Inc менен ажырашып, мурунку фамилиясын кайтарат
"Кумтөр голд компани" ЖАКтын ишмердүүлүгү боюнча мамлекеттик комиссянын төрагасы Акылбек Жапаров Кыргызстан Centerra Gold Inc менен ажырашып, мурунку фамилиясын кайтарат, деп үмүттөнүүдө. Бул тууралуу ал бүгүн, 20-майда Жогорку Кеңештеги пресс-конференция учурунда билдирди.
Анын айтымында, талаш маселелер боюнча сүйлөшүүлөр Кыргызстандын эгемендүүлүгүнүн 30-жылдыгына чейин, башкача айтканда ушул жылдын 31-августуна чейин жыйынтыкталат, деп үмүттөнүүдө.
"Же соттошуш керек же ажырашыш керек", - дейт депутат.
Журналисттин ажырашыш керек дегениңиз кандай?, - деген суроосуна Жапаров мындай жооп кайтарды:
"Ажырашып, кыз кезиндеги фамилиясын кайра кайтарыш керек. Алар өз оокатын чогултуп, чыгып кетишсе, биз өз оокатыбыз менен бул жерде кала берет элек. Бүгүнкү күндө "Кумтөр голд компанинин" наркы 2 млрд 400 млн долларды түзөт, толугу менен Centerra Gold Inc. - 4 млрд, ага коюлган экологиялык айып пул - 3 млрд доллар жана салыктар - 1 млрд 166 млн. Ажыраша турган болсок 5-6 вариантыбыз бар".
Кыргызстан үчүн бүтпөгөн тозоктон көрө, "Центерранын" коррупциялык менеджментинин кейиштүү болсо да бүткөнү жакшыраак эмеспи. Качан? Көрө жатарбыз.
