Сокулукта каза болгон окуучунун классташтары сурак беришкен
Сокулук районундагы окуучунун өлүмү боюнча кылмыш ишин иликтөөнүн жүрүшү ИИМ жетекчилигинин көзөмөлүнө алынды. Бул туурасында Чүй ОИИББден кабарлашты.
Белгилесек, 5-сентябрда саат 15:30 чамасында милицияга Сокулук районунун Комсомол айылындагы орто мектептин 9-классынын окуучусу А.Э`нын каза болгондугу тууралуу маалымат түшкөн.
Сокулук РИИБи бул фактыны каттап, иликтөө иштерин баштаган. Текшерүүдө А.Э`нин классташтары социалдык кызматкерлердин катышуусунда суракка алынып, буларды айтып беришкен.
Мурда ошол мектепте 1 класс жогору окуган, учурда эч жерде билим албаган Б.С. аларды мектептен 2 чакырым алыс жакка чогултуп, профилактикалык сүйлөшүү жүргүзүп, А.Э`ны урган. Соккудан улам А.Э`нин абалы начарлап, каза болуп калганын айтышкан.
Чогултулган материалдын негизинде бардык зарыл болгон соттук-укуктук экспертизалар дайындалган. Бул фактынын негизинде 130-берене (Адамдын өлүмүнө алып келген ден соолукка оор залал келтирүү) менен кылмыш иши козголуп, шектүү 2 айга камалды.
Кылмыш иши боюнча Чүй ОИИББдин башчысынын буйругу менен тажрыйбалуу кызматкерлерден "Тергөө-ыкчам тобун түзүү жөнүндө" буйругу чыкты.
Мындан тышкары Сокулук районундагы бардык мектептерде милиция кызматкерлери, мектеп администрациясы жана социалдык кызматтардын өкүлдөрү менен биргеликте окуучулар, алардын ата-энелери менен профилактикалык сүйлөшүүлөү жүргүзүлүүдө.
Башкы беттеги сүрөт иллюстрациялык: istock.
