Ысык-Атада шеригинин бир көзүн агыза сабаганга шектүү кармалды
Ысык-Ата районунда 57 жаштагы кишинин ден соолугуна оор залал келтирип, бир көзүн агызганга шектүү кармалды. Бул тууралуу Чүй ОИИББден кабарлашты.
Башкармалыктын маалыматы боюнча, 17-августта саат 21:00 чамасында Ысык-Атадагы көлмөдө Я.И. спирт ичимдигин ичип отурган Э.В. менен уруша кетип, шеригинин денесине залал келтирген. 1967-жылы туулган Э.В. көптөгөн жаракаттары менен аймактык ооруканага жаткырылган.
Бул факты каттоого алынып, тергөөгө чейинки тергөө иштери башталган.
Соттук-медициналык экспертизанын корутундусу боюнча, жабырлануучу денесинен көптөгөн жаракаттарды алган, анын ичинде сол көзү агып, ден соолугуна олуттуу коркунуч жаралган.
Кылмыш-жаза кодексинин 130-беренесинин ("Ден соолукка атайылап оор залал келтирүү") негизинде кылмыш иши козголуп, шектүү катары 1984-жылы туулган Я.И. кармалып, убактылуу кармоочу жайга киргизилди. Учурда бул окуя боюнча тергөө амалдары улантылууда.
