Кытай Кыргызстанга аскердик-техникаларды белек кылды (фото)
2021-жылдын 26-майында Кыргыз Республикасынын Улуттук Гвардиясында Кытай Эл Республикасынын Элдик Боштондук Армиясы тарабынан бекер берилген аскердик-техникаларды тапшыруу аземи болуп өттү.
Иш-чарага Кыргыз Республикасынын Коргоо министри генерал-майор Таалайбек Өмүралиев жана Кытай Эл Республикасынын Кыргыз Республикасындагы ыйгарым укуктуу Элчиси Ду Дэвен айым катышты.
Салтанаттуу иш-чаранын жүрүшүндө генерал-майор Өмүралиев жана элчи Ду Дьюен аскердик продукциялардын тартууланган үлгүлөрү менен таанышып, алардын техникалык мүнөздөмөлөрүн талкуулашты.
Өмүралиев Кытай Элдик-Боштондук Армиясына көрсөткөн жардамы үчүн ыраазычылык билдирип, кызматташтыктын деңгээлин мындан ары жогорулатууга ишеним артып жатканын билдирди.
Аскердик-техникалык жардам Кыргыз Республикасынын Куралдуу күчтөрү менен Кытай Эл Республикасынын ортосунда мурда кол коюлган келишимдерди ишке ашыруунун алкагында көрсөтүлдү.
