Жогорку Кеңеште интимдик сүрөт, видеолорду тараткандарга жазаны катаалдатуу сунушталды
Жогорку Кеңештин Мыйзамдуулук жана укук тартиби боюнча комитети жалпыга маалымдоо каражаттарында, социалдык тармактарда жалган жалаа жабуу жана мазактоо үчүн айып пул салууну караган мыйзам долбоорун карады.
Анда депутат Арсланбек Эгембердиев интимдик сүрөттөр жана видеолор ар-намысты, кадыр-баркты түшүргөн маалымат категориясына кирерине кызыкты.
"Интимдик сүрөт жана видеолорду тараткандарга жаза катаал болушу керек. Мындай сүрөттөрдү жана видеолорду таратуу үй-бүлөнүн бузулушуна, өзүн-өзү өлтүрүүгө жана өкүмсүз эле жазалоого алып келиши мүмкүн. Ошондуктан мындай фото жана видеолорду таратууну өзүнчө кароо керек, анткени 100 миң сом жаза эмес", - деди Эгембердиев.
Депутат ошондой эле жалпыга маалымдоо каражаттарындагы жана социалдык тармактардагы жалган жалаа үчүн айып пулду 1000 эсептик көрсөткүчтөн 500гө чейин төмөндөтүүнү сунуштады.
"Башында адамдар жоопкерчиликти билбеши мүмкүн, ошондуктан биринчи жолу мыйзам бузгандарга жазаны жеңилирээк кылуу керек", - деди депутат.
Акыркы эскертүүгө юстиция министринин орун басары Орозбек Сыдыков көңүл бурду.
