Санкциялар коркунчунан улам 50 компаниянын иши токтотулду
Кыргызстандын Юстиция министрлиги санкциялар коркунучунан улам бир эле учурда 50 компаниянын ишин токтотту. Аталган министрликтин маалыматы боюнча, бул юридикалык жактар санкциялардын тобокелдиги жогорулаган бүтүмдөргө катышкан болушу мүмкүн.
Компаниялардын тизмеси Юстиция министрлигине Экономика министрлиги жана башка мамлекеттик органдар тарабынан берилген. Алар санкциялардын чектөөлөрүн айланып өтүү боюнча мүмкүн болгон аракеттер тууралуу маалыматты карап чыгышкан.
Юстиция министрлиги бул чара кыргыз экономикасын коргоо жана Батыш өлкөлөрүнүн экинчи санкцияларынын алдын алуу үчүн зарыл экенин билдирет.
Мурда кыргызстандык "Керемет Банк" жана "Капитал Банк" банктары Евробиримдиктин, АКШнын жана Улуу Британиянын санкцияларына дуушар болушкан. Бул банктарга карата Евробиримдиктин чектөөлөрү 2026-жылдын 14-майында күчүнө кирет.
