Арашан асыл тукум койлорун экспортко чыгарууга уруксат берилди
Министрлер Кабинети айыл чарба жаныбарларын сыртка чыгарууга тыюу салган токтомго өзгөртүүлөрдү киргизди. Суу ресурстары, айыл чарба министрлиги кабарлагандай, өзгөртүү өлкөнүн азык-түлүк коопсуздугун камсыздоо жана азык-түлүк товарларынын бааларын турукташтыруу максатын көздөйт.
Өзгөртүүгө ылайык, Кыргызстандан мал-жандыктарды ташып чыгууга убактылуу тыюу салуудан төмөнкү учурлар өзгөчө тартипте чыгарылды:
- асыл тукум койлор, козулар жана кочкорлору менен бирге;
- Кыргызстанда өстүрүлбөгөн жана мамлекеттик оператор - Кыргыз Агрохолдинг мамлекеттик ишканасы экспортко чыгара турган тирүүлөй малдар.
Буга чейин мал-жандыктын бардыгын Кыргызстандын аймагынан ташып чыгууга чектөө бар болчу.
Токтом расмий жарыяланган күндөн тартып жети күн өткөндөн кийин күчүнө кирет.
Белгилесек, Суу ресурстары, айыл чарба жана кайра иштетүү өнөр жай министри Эрлист Акунбеков жакында "Арашан" асыл тукум койлорун өстүрүүчүлөр менен жолугуп, породаны эл аралык рынокко планын билдирген болчу.
