Толкунбек Абдыгулов Улуттук банктын башчылыгынан кетүүсүнүн чыныгы себебин айтты
Жогорку Кеңештин депутаттары бүгүн, 29-сентябрда Толкунбек Абдыгуловдун Улуттук банктын төрагалыгынан кетүүсүн жана Кубанычбек Бөкөнтаевдин талапкерлигин талкуулай баштады.
Президенттин парламенттеги өкүлү Анарбек Калматов Абдыгулов өз каалоосу менен кызматтан кетүү тууралуу арыз жазганын айтып, ошондуктан, анын орун басары катары Бөкөнтаевди дайындоо сунушталганын белгиледи.
Депутат Дастан Бекешев жыйынга Абдыгулов өзү катышса жакшы болорун белгилеген.
"Ал жолугушууга келүүдөн баш тартты. Биз аны мажбурлай албайбыз", - деп Калматов жооп берген.
Ага Бекешов "Кечээ Улуттук банк келечектеги кирешеден бюджетке 2,5 миллиард сом төлөдү деген маалымат берилген. Буга макул эместиги үчүн кеттиби? Мен ушуну сурагым келген", - деп кошумчалады.
Мирлан Жеенчороев "акыркы бир айдын ичинде Абдыгуловго кээ бир уятсыз адамдар тарабынан кысым көрсөтүлдү, алдамчылар кара пиар колдонушту. Депутаттар муну этибарга алышкан жок" деди.
"Аты аталып жаткан Фролов көп жылдар бою Кумтөрдөн алтын сатып алган "Номос" компаниясы менен байланышта болгон. Ал "Северный банкты" банкрот кылган. Эми бизде башка банк ачканы жатат. Фролов абдан шектүү адам. Кыргызстан алдамчылардын баш калкалоочу жайына айландыбы? Эмне үчүн биз буга чыдашыбыз керек? " - деди Жеенчороев.
Анын айтымында, бизде чоң пайыздар бар деп айткандардын Бишкекте ондогон батирлери бар. Алар дагы президент Садыр Жапаровдун ысымына жашынып, максатына жетет.
Ушундан кийин бир катар депутаттар Абдыгуловду чакырып, эмне үчүн арыз жазганын суроону сунушташты. Мындан улам ал жыйынга келген.
Ал депутаттар ага суроолорун берерден мурун, аткарылган иштер боюнча отчет берүүгө мүмкүнчүлүк сурады.
"Менин отставкам жөнүндө ... Президент менин билимимди жана тажрыйбамды башка тармакта колдонууну сунуштады. Башка ишке өткөндүгүмө байланыштуу арыз жаздым", - деп баса белгиледи Абдыгулов.
