Жапаров: Быйыл 15 мектеп курулду, бул учурду кийин Садыр Жапар менен байланыштырышат
Акылбек Жапаров Бишкек шаарындагы №20 мектеп-гимназиясынын ачылышында "Быйыл беш айдын ичинде Бишкекте 15 мектеп курулду. Мурда борбор калаада таптакыр жаңы мектеп курулбай калган учурлар болгон", - деди. Бул тууралуу министрлер кабинетинин маалыматтык камсыздоо бөлүмү билдирди.
Жапаров 500 окуучуга эсептелген үч кабаттуу жаңы мектепте спорт зал, спорт аянтчасы жана керектүү шарттар бар экенин белгиледи.
Курулуш иштери ушул жылдын 30-апрелинде башталган. Объекттин курулушуна 347 миллион сом, жабдууларга 13,2 миллион сом бөлүнгөн.
Ошондой эле министрлер кабинетинин башчысы буга чейин эң курч көйгөйлөрдүн бири мектептердин жетишсиздиги болуп келгенин белгиледи.
"1950-1959-жылдары Фрунзе шаарында 11 мектеп курулган, биз бул мезгилдерди Исхак Раззаков менен байланыштырганбыз. Ал эми 1960-1969-жылдары 31 мектеп курулган, бул Турдакун Усубалиевдин учуру. 2022-жылы Бишкекте 5 айда 15 мектеп, бир бала бакча курдук. Бул учурду кийин Садыр Жапаров менен байланыштырышат деп ойлойм", - деди министрлер кабинетинин башчысы.
