Казакстандагы президенттик шайлоо: Садыр Жапаров Токаевди жеңиши менен куттуктады
Президент Садыр Жапаров Касым-Жомарт Токаевди Казакстандагы президенттик шайлоодогу жеңиши менен куттуктады. Эки өлкөнүн лидерлери телефон аркылуу сүйлөшкөнүн президенттин администрациясынан кабарлашат.
Сүйлөшүү учурунда Садыр Жапаров Касым-Жомарт Токаевди президенттик шайлоодогу ишенимдүү жеңиши менен куттуктап, анын жеңиши казак элинин колдоосу менен ишениминин маанилүү көрсөткүчү экенин белгиледи.
"Шайлоонун жыйынтыгы Касым-Жомарт Токаевдин жаңы мамлекетти курууга, экономикалык өсүштү камсыз кылууга жана казак элинин бакубаттуулугун жогорулатууга багытталган саясий аракетин колдоорун тастыктады", - деп айтылат билдирүүдө.
Мындан тышкары өлкө лидерлери эки тараптуу кызматташтыктын мындан аркы келечегин, аймактык кызматташтык маселелерин, ошондой эле үстүбүздөгү жылдын 9-декабрына Бишкекте өткөрүү белгиленген Жогорку Евразиялык экономикалык кеңештин алдыдагы жыйынына даярдыктарды талкуулашты.
Белгилесек, 20-ноябрда Казакстанда кезексиз президенттик шайлоо өттү. Анда Касым-Жомарт Токаев шайлоочулардын 82 пайызга жакын добушуна ээ болуп, жеңишке жеткени кабарланды.
