Алтуха, Протез, Кения. Көлбаевдин уюшкан кылмыштуу тобунун мүчөлөрү кармалды

Кримтөбөл Камчы Асанбектин (Көлбаев) уюшкан кылмыштуу тобунун активдүү мүчөлөрү кармалды. Бул туурасында УКМКнын маалымат кызматы кабарлайт.

Маалымдалгандай, уюшкан кылмыштуу топтун мүчөлөрүнүн мыйзамсыз аракеттери токтотулду.

Алар көп жылдар бою эл керектөөчү товарларды (Кытайдан экспорттолгон товарлар) тартып алуу менен алектенип келишкен. Алар ишкерлерден жана жарандардан акча талап кылышкан, кийин Кыргызстанда жана КМШ мамлекеттеринин аймагында туруктуу кылмыштуу схеманы уюштурган.

УКМК тарабынан 209-берененин 4-бөлүгүндө (Алдамчылык) каралган кылмыштын белгилери боюнча кылмыш иши козголгон. Тергөө иш-чараларынын жүрүшүндө 23-майда Бишкек шаарынын жана Чүй облусунун аймагында К.Асанбектин уюшкан кылмыштуу тобунун активдүү мүчөлөрү – Алтуха каймана аты менен белгилүү А.И., А.К., Протез каймана аты бар А.Ш. жана Кения каймана аты бар К.Т. кармалып, УКМКнын тергөө камак жайына киргизилди.

Ыкчам иш-чаралардын жүрүшүндө жогоруда аталган адамдар алдамчылык менен жеке менчик транспорттук-логистикалык компаниядан жалпы суммасы болжол менен 385 миң долларды түзгөн эл керектөөчү товарларды мыйзамсыз түрдө тартып алышканы аныкталган.

Учурда УКМК тарабынан бул кылмыш ишинин алкагында тиешелүү тергөө амалдары жүргүзүлүүдө. Ошондой эле жогоруда аталган адамдардын ушул сыяктуу башка мыйзамсыз фактыларга катыштыгы бар экендиги аныкталууда. Ошондой эле УКМК жарандарды уюшкан кылмыштуу топтор тарабынан мыйзам бузуунун бардык фактылары боюнча кайрылууга жана билдирүүгө чакырат. Тергөө иштери уланууда.