5 кыргызстандык жаракат алды. Элчилик Россиядагы массалык мушташ боюнча маалымат таратты
Россиядагы Ковыктин кенинде Кыргызстан менен Тажикстандан барган жүздөгөн мигранттардын катышуусунда массалык мушташ чыкканы кабарланган. Кыргызстандын Россиядагы элчилиги чыр-чатактан 5 кыргызстандык жаракат алганын кабарлады.
Маалыматта айтылгандай, 23-июнда Россиянын Жигалов районундагы ишканада кыргыз, тажик жарандарынын ортосунда турмуштук шарттан улам жаңжал чыгып, 500дөн ашык адам катышкан.
Элчиликтин канцеляриясы жабыркагандар менен ыкчам байланыш түздү. Кыргыз Республикасынын 5 жараны ар кандай деңгээлдеги жаракаттарды алып, алардын бири ооруканага жаткырылды. Бул факты боюнча Россия Федерациясынын укук коргоо органдары тарабынан ыкчам-иликтөө иш-чаралары жүргүзүлүүдө.
Элчиликтин Иркутск шаарындагы кеңсесинин консулу кыргыз жарандарына консулдук-укуктук жардам көрсөтүү жана жергиликтүү укук коргоо органдарынын өкүлдөрү менен жолугушууларды өткөрүү үчүн окуя болгон жерге барган.
Бул маселе элчиликтин көзөмөлүндө.
