Министрлик Москвада кармалган кыргызстандыктын иши боюнча маалымат берди
Москвада эмгектенип жүргөн 20 жаштагы Нурмухаммед Токобаевдин кармалышы боюнча Тышкы иштер министрлиги билдирүү таратты.
Буга чейин кыргызстандык жигиттин апасы өлкө жетекчилигине кайрылып, уулуна кине тагылып, 9 жылдан 15 жылга чейин камалып кетерин же Украинадагы согушка катышууга мажбурлап жатканын айтып, жардам сураган.
Тышкы иштер министрлиги Россиянын бийлигинен алган маалыматка караганда, 2-апрелде Н.Т. "Баңги каражаттарын, психотроптук заттарды же алардын аналогдорун мыйзамсыз өндүрүү, сатуу же жөнөтүү, ошондой эле баңги каражаттарын же психотроптук заттарды камтыган өсүмдүктөрдү же алардын курамында баңги каражаттарын, психотроптук заттарды камтыган бөлүктөрүн мыйзамсыз сатуу же жөнөтүү" беренеси менен кармалган. Соттун чечими менен ал камакта калтырылган.
Кыргызстандын жараны Украинанын аймагындагы атайын аскердик операцияга катышууга мажбур болгондугу тууралуу маалымат тастыкталган жок.
Учурда элчиликтин компетенциясынын чегинде мекендешке керектүү консулдук-укуктук жардам көрсөтүү боюнча бардык чаралар көрүлүп жатканын кошумчалашты министрликтен.
Башкы беттеги сүрөт: turmush.kg.
