Бишкектин Айтматов проспектисиндеги көпүрө жаңыланат (сүрөт)
Бишкекте Ч.Айтматов проспектиси менен Л.Толстой көчөлөрүнүн кесилишиндеги эстакадалык көпүрөдө оңдоо иштери 16-майда башталды. Оңдоо иштерине байланыштуу Ч.Айтматов проспектисинен Л.Толстой көчөсүнө чейинки тилке убактылуу жабылды.
Бишкек шаардык мэриясы кабарлагандай, Ч.Айтматов проспектисиндеги курулуш иштери жүрүп жаткан жерлерде асфальт төшөө иштерине байланыштуу эстакадалык көпүрөнүн эки тарабына убактылуу тосмолор орнотулат.
Жол кыймылына чектөөлөр 2026-жылдын 15-июлуна чейин күчүндө болот.
Аткарылуучу жумуштарга - эскирген конструкцияларды демонтаждоо, анын ичинде каптамаларды алып салуу, тротуарларды оңдоо, аянтты тазалоо жана курулуш таштандыларын чыгаруу кирет.
Жумуштардын өзүнчө топтомуна коммуналдык инфраструктураны жаңыртуу, анын ичинде жаңы кабелдик линияларды тартуу, жарыктандыруу жабдууларын алмаштыруу жана энергияны үнөмдөөчү LED лампаларын орнотуу кирет. Акыркы этапта темир тосмолор орнотулат.
