Жалал-Абадда эркек кишинин жансыз денеси төшөккө оролгон абалда табылды
Жалал-Абадда эркек кишинин сөөгү төшөккө оролгон абалда табылды. Маркумдун өлүмүнүн себеби такталып жатканын облустук ички иштер башкармалыгынан билдиришти.
Белгилүү болгондой, 5-сентябрда саат 18:40 чамасында милицияга кабар түшкөн. Анда Көк-Арт кичи шаарчасындагы кароосуз турган унаа жуучуу жайдын артында белгисиз адамдын сөөгү төшөктө оролгон абалда жатканы маалымдалган.
Жерине Жалал-Абад ШИИБдин жетекчилиги жана ыкчам тергөө тобу прокуратура кызматкерлери менен биргеликте барышкан. Жансыз денени сырттан кароо учурунда кандайдыр бир тактар, издер болгон эмес. Маркумдун аты-жөнү белгисиз, анын сөөгү өлүкканага жеткирилип, дене жаракаттарын жана өлүмүнүн себебин аныктоо максатында соттук-медициналык экспертиза дайындалды.
Бул факты каттоого алынып, текшерүү иштери жүргүзүлүүдө.
