ЖЭБдеги авария. Жабырлануучу үй-бүлөсүн багуу үчүн эки жумушта иштегенин айтты
ЖЭБдеги авариядан жабыркагандардын бири министрлер кабинетинин башчысы Акылбек Жапаровго үй-бүлөсүн багуу үчүн эки жумушта иштегенин айтты.
Жабырлануучунун айтымында, ал үй-бүлөдө жалгыз уул жана пенсиядагы ата-энесин багып келет. Анын бир уул, бир кызы бар, жубайы экөө үчүнчү наристесин күтүп жатышат. Министрлер кабинетинин башчысы жабырлануучуга бардык зарыл жардамдарды көрсөтүүгө жана анын жакындарына кам көрүүгө убада берди.
1-февралдан 2-февралга караган түнү Бишкек ЖЭБинде авария болгон. Беш адам жаракат алган. Бардык мектептер жана бала бакчалар 2-февралдан 6-февралга чейин онлайн окутууга өткөрүлгөн. Жылуулук электр борборунун жана жылуулук тармактарынын ишин камсыз кылуу үчүн ысык суу өчүрүлгөн. ЖЭБдеги авария боюнча Бишкек прокуратурасы иш козгоп, тергөөнү УКМКга тапшырган. 5-февралга карата Бишкек шаарынын тургундарынын үйлөрүндө жылуулук калыбына келтирилди.
