Жаныбек Абиров муштумун тийгизген жигиттен кечирим сурап, тараптар элдешти. Видео

Мушташтан кийин депутаттык мандатын тапшырган Жаныбек Абиров жабырлануучудан, анын ата-энесинен кечирим сурады. Алардын видеосу социалдык тармакка тарады.

Анда Жаныбек Абиров өзүнүн жана окуяга катышкандардын атынан кечирим сураган. "Эмоцияга алдырып, туура эмес кылганыбызды түшүнүп, кабыл алдык. Силерден кечирим сурайбыз. Бири-бирибизге бир тууган бололу. Мындан кийин мамилебиз да, саламыбыз да түз болсун. Биз да өкүнүп жатабыз. Үй-бүлөбүздүн, балдардын атынан кечирим сурайбыз", - дедт Абиров.

Жабырлануучу тарап түшүнбөстүктөр болуп кеткенин айтып, "кечирдим" деп кол алышты.

Эске салсак, 11-мартта Абиров жеке күзөт кызматынын кызматкерин сабап салган. Жабырлануучу баш мээнин жабык жаракаты менен Улуттук госпиталга жаткырылган. Бул окуяга президент Садыр Жапаров реакция жасап, 13-мартта окуяга тиешеси бар эки шектүү милиция тарабынан кармалган.